fbpx

Хелсиншки комитет со иницијатива до Уставен за законските измени поврзани со „Бехтел и Енка“

Хелсиншкиот комитет смета дека со законските измени се доведуваат до нееднаков третман работниците од исти и од различни гранки, а отсуството на законска рамка која ќе го регулира прогласувањето на одредени проекти од „национално или стратешко значење“ доведува до правна несигурност и широко поле за злоупотреби

-

Хелсиншкиот комитет за човекови права доставил иницијатива до Уставниот суд за оценување на уставноста и законитоста на членовите 1, 2 и 3 од Законот за изменување и дополнување на Законот за работните односи (ЗРО), поврзани со реализацијата на Договорот со „Бехтел и Енка“ за изградба на четири автопатски делници на коридорите 8 и 10д.

Според Хелсиншки, ваквото законско решение претставува повреда на Уставот и овозможува целосно заобиколување на процедурите за носење на закони.

„Издигнувањето на одлуките на извршната власт на ниво на закон значи мешање на извршната во улогата на законодавната власт. Со користење на поимот национален стратешки интерес (без негово подетално дефинирање), како основ за утврдување на паралелни правила кои ќе важат само во одредени случаи, се овозможува постоење на напоредни законски решенија за работните односи, чија примена ќе зависи од проценката на одредени структури што не се јасно утврдени. Резултат на тоа е правна несигурност и нееднаквост на граѓаните пред Уставот и законите“, се вели во соопштението на Хелсиншкиот комитет.

Оттаму тврдат дека законските измени претставуваат експлоататорски решенија што ги уназадуваат работните односи во државата и ја оддалечуваат од тенденциите на Европската Унија и меѓународните конвенции.

Со предложените измени, според комитетот, драстично се ограничува и оневозможува остварувањето на работничките права.

„Станува збор за намалување на траењето на дневниот и неделниот одмор во стратешки проекти, но имајќи го предвид актуелниот повод за измените во законот, се работи за градежништвото, каде работата се извршува на отворено, во секакви временски услови и бара исклучителни физички напори. Воедно се работи за извршување работи и работни задачи каде што има највисок степен на ризик по безбедноста и здравјето при работа поради изложување на штетни материи и изложување на опасни активности за кои се потребни посебна психофизичка подготвеност и луцидност во извршувањето. Тоа е класична експлоатација на работната сила, која излегува од рамките на хуманизмот и хуманиот третман на човекот и граѓанинот што подразбира вреднување на човечкото суштество и човековата состојба“, се вели во соопштението.

Хелсиншкиот комитет смета дека со законските измени се доведуваат до нееднаков третман работниците од исти и од различни гранки, а отсуството на законска рамка која ќе го регулира прогласувањето на одредени проекти од „национално или стратешко значење“ доведува до правна несигурност и широко поле за злоупотреби.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

(ВИДЕО) Денот на Општина Тетово се одбележа со отпадоци и со депонии

Денес се одбележа денот на Општина Тетово, а повеќе од една недела градот се гуши во отпадоци и депонии расфрлани насекаде. Решение за овој проблем немаат ниту општинските власти,...