Еврокомесарот за проширување, Јоханес Хан, во видеообраќање на регионалната конференција на БИРН во Сараево „Предизвици за медиумската слобода“, изјави дека состојбата со слободата на медиумите на Балканот предизвикува голема загриженост и бара итно внимание.
Хан рече дека слободата на медиумите на Балканот останува точка на особена загриженост за Европската комисија, особено прашањето на владиното мешање и закани против независноста на јавните радиодифузни сервиси.
„Се соочуваме со важни предизвици кои мора итно да бидат адресирани. Покрај владиното мешање, повеќе напори мора да се посветат и на политичката и на финансиска независност на регулаторните тела, како и на поефективно функционирање на саморегулацијата“, рече Хан.
Тој додаде дека ќе продолжи да ги притиска владите во регионот да остваруваат прогрес на ова поле.
„Постои потреба да се справиме и со неформалниот економски притисок врз медиумите. Ова вклучува транспарентност на сопствеништвото врз медиумите и спречување на прекумерната медиумска концентрација. Не помалку важна е и транспарентноста при владиното рекламирање“, рече Хан.
На конференцијата, која се одржува како дел од десетгодишнината на БИРН, била усвоена и листа со препораки до владите на Балканот, чија цел е унапредување на положбата на медиумите во регионот.
Препораките се резултат на заедничкиот труд на повеќе од 30 медиумски професионалци и експерти кои се собраа во Сараево еден ден порано, на регионалната работилница за слобода на говорот. Тие дискутираа прашања поврзани со работничките права, државното финансирање на медиумите и на јавните сервиси, медиумскиот пазар, транспарентноста на медиумското сопствеништво, како и за претставувањето на ранливите и на маргинализирани групи.
