По трет пат во своето постоење, Фондацијата Метаморфозис е поканета да учествува на Стокхолмскиот форум за Интернет (Stockholm Internet Forum – SIF) како еден од најважните глобални настани во областа на технологијата и Интернетот. Оваа година, SIF е целосно дигитално искуство, создавајќи единствена можност учесниците да се здружат и да ги придвижат нашите цели преку границите и временските зони.
Седмото издание на SIF, во организација на Шведската агенција за меѓународен развој (СИДА), се одржува онлајн помеѓу 10 и 12 мај, со пред-сесии на 7 мај. #SIF2020 е платформа за унапредување на слободниот, отворен и безбеден Интернет како двигател за развој. Посетувањето на овој форум е возможно единствено со покана, додека говорници се истакнати светски личности и активисти. Оваа година, двајца претставници на Фондацијата Метаморфозис беа поканети да учествуваат на SIF, односно Бардил Јашари, извршен директор за кого ова е и трета покана и Мила Јосифовска Даниловска, менаџер на програмата за социјална одговорност и човекови права на Интернет.
Овогодинешната тема на форумот е „Мобилизирање за дигитална флексибилност – бесплатен, отворен и безбеден интернет во променливите пејзажи на пандемијата“.
Организаторите испратија порака во која се вели: „Глобалната интернет слобода продолжува да опаѓа. Во време на пандемија, видовме сѐ поголеми разлики низ целиот свет. Ајде да се соединиме како заедница, да учиме, да градиме и да решаваме, да ја зајакнеме демократијата и да се бориме против сиромаштијата “.
Бардил Јашари, извршниот директор на Фондацијата Метаморфозис истакна дека:
Оваа година фокусот на форумот беше ставен на предизвиците поврзани со употребата на алгоритмите и вештачката интелегенција и како тие влијаат, ги загрозуваат и можат потенцијално уште повеќе да ги загрозат човековите права. На некој начин, впечатокот беше дека овие нови технологии бараат од НВО повторно засилено да работат на потсетување, реафирмација и засилена промоција на основните вредности и принципи поврзани со заштитата на човековите права.
Според Мила Јосифовска Даниловска, да се биде дел од Стокхолмскиот форум за Интернет 2021 помеѓу инспиративната група на бранители на човековите права е огромна чест, но и признание за Фондацијата Метаморфозис за клучната улога во промовирањето на бесплатен, отворен и безбеден Интернет за сите, како и на залагањето за инклузивна дигитализација базирана на човековите права.
„Беше многу интересно да се види како далечните заедници ширум светот ги решаваат проблемите со интернет поврзаност, особено пречките во образовниот процес на Интернет, и се обидуваат да создадат решенија поттикнати од самата заедница. Она што беше воодушевувачки е да се види како самите заедници, со цел да ги „поврзат неповрзаните“, се одлучија за користење бесплатни природни, еколошки и одржливи ресурси за поддршка на интернет поврзаноста, а со тоа и успејаа во намалување на трошоците што заедницата секако не може никако да си ги дозволи“, додаде Јосифовска Даниловска.
Таа истакна дека, од она што беше презентирано на Форумот јасно е дека дигиталниот јаз е сè уште голем и постојат многу пречки за дигитално вклучување, особено на девојчињата и жените во далечните и поконзервативни заедници, бидејќи дури и во нивното детство тие не се стимулирани да преземат иницијатива и да учествуваат суштински во општеството.
„Дигитализацијата е во основата на демократизацијата и зајакнувањето на човековите права на Интернет, и сите релевантни засегнати страни треба заеднички да го решат ова прашање земајќи ги предвид потребите и безбедноста на сите граѓани без исклучок“, заклучи таа.
Доколку сакате да дознаете повеќе за она што се дискутираше на Форумот, погледнете неколку од снимките од отворените сесии овде.
