Во близина на село Блаце во општина Чучер Сандево гори запалена висока сува трева, нискостеблеста вегетација и шума на карпест непристапен терен, соопшти Центарот за управување со кризи (ЦУК). Оттаму информираат дека пожарот го следат вработени во јавното претпријатие „Македонски шуми“.
„Утринскиот извештај од Регионалниот ЦУК Скопје бележи дека вчера во скопскиот регион имало вкупно седум пожари на отворено од кои еден е активен. Бригадата за противпожарна заштита БППЗ на град Скопје имаше полни раце работа на повеќе страни од скопско, посебно во доцните попладневни и часови кога со поддршка од воздух од трите „Ер трактор“ авиони и еден хеликоптер ги изгасна тие што претставуваа опасност за населбите околу градот“, информираат вработените во ЦУК.
Оттаму додаваат дека локализирани се шест пожари во скопско.
„Локализиран се пожари во општина Студеничани, во село Горно Количани, но и пожар во општина Сарај, с. Љубин. Потоа, локализиран е пожар во село Страчинци во општина Гази Баба, потоа, кај обиколницата во близина на Стајковци, но и кај езерото Треска. Под контрола е ставен и пожар во село Злокуќани“, информираат во ЦУК.
