!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ една вечер ќе протестира пред Министерство за правда, друга пред „Шутка“


Скопје, 14 декември, 2017 - 20:42 (META) 

Од утре ВМРО-ДПМНЕ ќе ја менува рутата и локацијата на протестите против притворањето на осомничените за насилствата во Собранието од 27 април, меѓу кои се и шестмина пратеници на опозициската партија.

Ова на вечерашниот протест пред Министерството за правда во најави Александар Николовски, кој во своето обраќање пред насобраните граѓани рече дека од утре па натаму една вечер протести ќе има пред Министерството за правда, а една вечер пред истражниот затвор „Скопје“ во населбата Шуто Оризари за да им се даде поддршка на, како што рече, неправедно притворените.

– Сега пред да дојдам тука имав можност да се сретнам со роднините на дел од притворените, дел се и тука меѓу нас. Сите велат дека овие собири многу им значат и тоа треба да е еден мотив да доаѓаме секоја вечер, да сме што побројни, да е што помасовно и да ги поддржиме овие луѓе-рече – Николоски.

Никола Мицевски пред насобраните граѓани изјави оти се надеваат дека „СДС ќе ги увиди своите грешки и ќе почнат соодветно да го спроведуваат законот“, а не да врши класичен политички прогон и демонстрирање на сила“.

– Денеска од овде бараме безусловно запирање на сите овие процеси на политички прогон, бараме итно и безусловно стопирање на малтретирањата, на теророт и изживувањето кое што го прави СДС. Бараме итно пуштање на слобода на сите лица кои се опфатени со овој класичен политички прогон – рече Мицевски.


ВМРО-ДПМНЕ без најава за блокирање на раскрсници, ќе протестира пред Министерството за правда


Скопје, 11 декември, 2017 - 11:09 (META) 

Опозициската ВМРО-ДПМНЕ за денеска нема најавено блокирање на раскрсници во Скопје, а протестот против притворањето на триесетина лица поради насилствата во Собранието од 27 април е закажан во 18 часот пред Министерството за правда.

Од партијата велат дека „Македонија е земја на политички затвореници, со монтирани обвиненија за тероризам“ и нагласуваат дека остануваат на улиците „се додека хунтата ги гази законите и се изживува со граѓаните“.

„Се притвораат уметници, актери, режисери, архитекти, припадници на полицијата, се притвораат луѓе кои дале и даваат свој придонес за општеството, само затоа што не се согласуваат со политиките на СДС. Судовите не одлучуваат согласно закон, туку по диктат, затоа се и смешните и апсурдни обвиненијата за тероризам против 36-те македонски патриоти“, стои во соопштението од ВМРО-ДПМНЕ.

Од партијата бараат безусловно запирање на сите овие процеси на политичкиот прогон, итно и безусловно стопирање на малтретирањата, на теророт и изживувањето кое го прави СДС и итно пуштање на слобода на сите лица кои се опфатени со овој класичен политички прогон.


Протест пред затворот во Шутка за ослободување на притворените за 27 април


Скопје, 10 декември, 2017 - 18:02 (META) 

ВМРО-ДПМНЕ попладнево одржа протест пред Истражниот затвор Скопје во Шуто Оризари, барајќи да бидат ослободени притворените пратеници и други, против кои Основното јавно обвинителство за гонење организиран криминал и корупција почна истрага за тероризам поради насилствата во Собранието на 27 април.

– Се собравме и денеска да им дадеме поддршка и да ги охрабриме дека сме со нив и дека нема да ги оставиме сами и оти на крај вистината ќе победи и ќе ја видиме. Апелираме да се пуштат сите притворени лица, нема каде да бегаат, без нив не можеме да работиме во Парламентот. Да седнеме и заеднички да разговараме на маса, од сите политички партии – рече на протестот пратеникот од оваа партија Трајчо Димков.

Дафина Стојаноска порача дека како дел од пратениците на ВМРО-ДПМНЕ бара веднаш да престане овој политички прогон.

– Им порачуваме на оние кои што го смислиле ова да престанат да смислуваат црни листи за македонските патриоти. Упорно овој народ го втурнувате во конфликти, мислете на генерациите кои доаѓаат. ВМРО-ДПМНЕ докажувало и ќе докажува дека е за заедничка просперитетна и европска Македонија – рече Стојаноска.

На протестот присуствуваше и лидерот на ВМРО-ДПМНЕ Никола Груевски.


Нацев: ВМРО-ДПМНЕ не потклекнала и во многу потешки времиња


Скопје, 7 декември, 2017 - 20:44 (META) 

По десетти пат се собравме за да им кажеме на сите дека притворените се наши браќа, а не терористи чиј единствен грев е што си ја сакаат државата, рече Дејан Митески од ВМРО-ДПМНЕ на вечерашниот протест на партијата пред Кривичниот суд, поради притворањето на 36 лица осомничени за насилствата во Собранието од 27 април, меѓу кои се и шестмина пратеници на опозициската партија.

Пред него, Александар Нацев рече дека сите 36 притворени се жртви на политички реваншизам и на прогонот „од страна на антидржавната хунта на СДСМ“.

– ВМРО-ДПМНЕ не потклекнала и пред многу други предизвици и во многу потешки времиња, ВМРО надживеала империи, војни, надживеала вештачки творби од држави, а ќе го преживее и ова денес – рече Нацев.

Светлана Колариќ од ВМРО-ДПМНЕ истакна дека СДСМ ја замолкнал правдата во Македонија и дека „терористи и тешки криминалци, убијци и разбојници се на слобода, а на нивните места се ставаат луѓе кои се невини“.

Таа изјави дека можеби СДСМ знаел, го очекувал или го подготвувал сценариото за 27 април.

Меѓу присутните на вечерашниот протест беше и лидерот на ВМРО-ДПМНЕ, Никола Груевски.


Уапсени најмалку 17 принцови и функционери во Саудиска Арабија


Ријад, 5 ноември, 2017 - 18:13 (META) 

Новоформираната Антикорупциска комисија во Саудиска Арабија уапси најмалку 17 принцови и државни функционери, јавија светските медиуми.

Според информациите, тие се притворени во луксузни хотели, а не во затвори.

Меѓу уапсените е и принцот Алвалид бин Тала, милијардер што поседува 95 отсто од „Кингдом холдинг“, голема корпорација што има удели во глобални компании како „Твитер“, „Епл“, „Сити груп“ и „Њус корп“.

Уапсени се најмалку 38 поранешни и сегашни министри и заменици-министри. Сите се товарат за корупција.

Новата антикорупциска иницијатива е по наредба на кралот Салман. Според некои аналитичари, новата акција е дел од обидот на Салман да ги тргне своите роднини од врвот на земјата, која е најголем светски извозник на нафта.


Кампањата за локалните избори заврши, гласаат затворениците, болните и раселените


Скопје, 28 октомври, 2017 - 10:24 (META) 

За вториот круг на локалните избори, кој ќе се одржи утре, денеска, од 7 до 19 часот ќе гласаат избирачите кои се на издржување казна затвор или се во притвор. На гласачките места во 13 казнено-поправни установи, своето избирачко право ќе можат да го остварат 939 гласачи.

Денеска, исто така, ќе гласаат и осум гласачи кои се водат како внатрешно раселени, како и 1.435 лица кои се болни или немоќни или во куќен притвор, а до општинските изборни комисии доставиле известувања со соодветна документација.

На полноќ заврши политичката кампања за локалните избори, а денеска е изборен молк. Вкупно 833.716 гласачи ќе имаат право на глас на 1.517 избирачки места во 35 општини.

Изборите ќе ги следат вкупно 5.101 домашни, 473 странски набљудувачи, 315 преведувачи и 20 странски новинари.


Борисов предупреди дека е можен терористички напад по немирите во бегалскиот камп


Софија, 25 ноември, 2016 - 15:48 (META) 

Состојбата во бегалскиот камп во Харманли на југот на Бугарија се нормализира по безредијата и немирите, кои избувнаа вчера и продолжија во текот на ноќта. Повеќе од 400 мигранти се задржани во притвор поради вандалско однесување, а во нередите се повредени 24 полицајци, од кои најтешко настраданиот има скршеница на раката.

Од Министерството за внатрешни работи на Бугарија соопштија дека се формирани две предсудски постапки за лицата кои учествувале во нередите.

Бугарскиот премиер во оставка, Бојко Борисов, кој ноќеска за време на немирите пристигна во бегалскиот камп, соопшти дека против сите што учествувале во безредијата ќе бидат поднесени обвиненија.

Тој повика и предупреди да се внимава на повиците за напади и на она што се објавува на социјалните мрежи бидејќи вакви настани вообичаено се проследени со терористички напади.

„Обично, онаму каде што има зголемување на насилствата, секогаш има и терористички акт, секогаш се активираат ќелиите со спијачи… Мрежите на Исламска држава многу внимателно го следат „Фејсбук“ и она што излегува во медиумите. Таквите, кои се прават големи херои, треба да знаат дека со вакво поведение можат да изложат на ризик огромен дел од населението“, изјави премиерот во оставка.

Претседателката на Агенцијата за бегалци, Петја Прванова, истакна дека најверојатно постои поврзаност меѓу мигрантските протести во Бугарија со оние во камповите во другите европски земји.

„Кога се запали кампот во Кале (Франција), инциденти имаше и во Харманли, кога имаше инцидент во Германија, имаше и тука. Вчера се запали камп на островот Лезбос, сега и тука. Очигледно има врска меѓу овие настани“, изјави Прванова за БТВ.

Немирите во кампот во Харманли биле предизвикани главно од мигранти од Авганистан.

„Групи Авганистанци тепаа Сиријци, за да излезат да се бунтуваат“, изјави Борисов.

Според него, постои можност бунтот да е организиран од надвор. Како аргумент за ова, тој го посочи фактот дека самите мигранти преку мобилни телефони пуштале снимки на социјалните мрежи.

Во декември треба да почне екстрадицијата, односно враќањето назад во нивната земја, на мигрантите од Авганистан. Како што соопшти Борисов, веќе бил нарачан авион од Кабул, а летот е организиран од бугарските власти во координација со Европската агенција за гранична и крајбрежна заштита.

По нередите, кампот во Хармални е целосно оштетен. Нанесена е сериозна материјална штета, а според зборовите на Борисов, не е останат ниту еден здрав прозорец.

Во моментов во центарот во Хармални има околу 2.700 лица, кои се разделени и групирани според нивната националост за да не дојде до нови судири. Во кампот има околу 600 деца и од 400 до 500 жени, кои, како што соопшти Прванова, се сместени на безбедно.


Бугарската полиција притвори 200 мигранти по немири во бегалски камп


Софија, 25 ноември, 2016 - 10:55 (META) 

Бугарската полиција притвори 200 мигранти по судирите во бегалски камп на југот на Бугарија, во кој биле повредени и 14 полицајци, соопштија бугарски официјални претставници.

Според портпаролката на бугарската полиција, Нина Николова, во нередите учествувале околу 2.000 мигранти, кои скандирале, палеле гуми и фрлале камења кон полицијата.

Тензиите, како што пренесуваат локалните медиумите, ескалирале вчера, поради што полицијата употребила водени топови за да ги прекине насилствата.

Се очекува во текот на денот бугарскиот премиер Бојко Борисов да го посети бегалскиот камп каде се случија нередите.


Осомничениот за терористичкиот напад во Ница имал петмина соучесници


Париз, 21 јули, 2016 - 20:40 (META) 

Возачот на камионот кој усмрти 84 лица во терористичкиот напад во Ница, Мохамед Булел, имал логистичка поддршка од петмина соучесници, кои сега се наоѓаат во притвор, соопштил денеска на прес-конференција францускиот обвинител Франсоа Молин, пренесува „Би-би-си“.

Обвинителот изјавил дека нападот бил планиран со месеци однапред, а еден од осомничените го снимал местото еден ден по нападот. Сите петмина осомничени со соочуваат со обвиненија за тероризам.

Станува збор за четворица мажи и за една жена, на возраст од 22 до 40 години, кои наскоро треба да бидат изведени пред суд.

Меѓу осомничените, како што пренесува „Би-би-си“, е и албанска двојка, осомничени дека му обезбедиле пиштол на Булел. Уште еден од осомничените, 22-годишен маж, се верува дека добил СМС-порака од возачот на камионот, вечерта кога беше изведен нападот, во која се зборувало за набавка на оружје. Според агенциите, полицијата во неговиот дом пронашла автоматска пушка „калашников“ и муниција.

Петтемина осомничени помагачи, како и самиот Булел, не им биле познати на француските разузнавачки служби пред нападот.


Обвиненија за 85 турски генерали по неуспешниот обид за државен удар


Анкара, 19 јули, 2016 - 11:30 (META) 

Турските правосудни власти поднеле обвиненија против 85 генерали и адмирали на војската, по неуспешниот обид за државен удар, додека неколку десетици сè уште се наоѓаат на распит, јавува турската државна агенција „Анадолија“.

По неуспешниот обид за пуч на 15 јули, во кој загинаа околу 300 луѓе, притворени се вкупно 103 генерали на турската војска, против кои се води истрага.

Меѓу обвинетите е и командантот на турските воздухопловни сили, генералот Ердал Остурк, кој призна дека дејствувал со намера да спроведе државен удар.