!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

ФИФА ќе ги казни Косово и Хрватска


Женева, 18 октомври, 2016 - 14:25 (META) 

ФИФА поведе дисциплински постапки против Косово и Хрватска поради тоа што навивачите на двете репрезентации за време на квалификациските натпревари за Светското фудбалско првенство извикуваа антисрпски пароли.

Навивачите на своите јазици скандирале „Убиј го Србинот“ на натпреварот на кој Хрватска победила со 6:0.

Натпреварот се одиграл на 6 октомври во албанскиот град Скадар, затоа што фудбалските стадиони на Косово не се усогласени со правилата на ФИФА.

Фудбалската федерација не соопшти кога ќе ја донесе одлуката.

Хрватска поради однесувањето на навивачите е веќе казнета и првите два натпревари од квалификациите на домашен терен ги играше без публика.


Денеска почнува „Еуро 2016“ во Франција


Париз, 10 јуни, 2016 - 10:25 (META) 

Со натпреварот меѓу репрезентациите на Франција и на Романија, денеска почнува Европското првенство во фудбал „Еуро 2016“, кое се одржува во Франција и ќе трае еден месец.

На првенството учествуваат 24 европски репрезентации, кои ќе играат на 10 стадиони во Франција, на кои се очекува посетеност од околу 2,5 милиони гледачи.

Организаторите на „Еуро 2016“ тврдат дека се преземени сите безбедносни мерки и дека нема простор за паника меѓу посетителите.

Повеќе од 90.000 полицајци, жандармерија и приватни агенти за безбедност ќе бидат распоредени на фудбалските стадиони, парковите и на местата на кои ќе се собираат поголем број луѓе.

Франција очекува околу 7 милиони луѓе – гости, туристи и навивачи за време на одржувањето на првенството.


Исламистите убиле 14, а раниле 20 навивачи на „Реал Мадрид“


Самара, 13 мај, 2016 - 19:18 (META) 

Најмалку 14 лица се убиени, а повеќе од 20 се ранети кога припадници на Исламска држава влегле во кафуле во градот Самара во Ирак и почнале да пукаат.

Во тој момент во кафулето имало околу 50 навивачи на шпанскиот фудбалски клуб „Реал Мадрид“, кои се собрале да гледаат снимка од натпревар на нивниот омилен клуб.

Според неофицијалните информации, во нападот учествувале тројца напаѓачи.

– Група терористи од Исламска држава влегоа во кафуле и потоа почнаа да пукаат по луѓето – изјави претседателот на клубот на обожаватели на „Реал Мадрид“ во Самара, Зиад Субхан.

Прашан за мотивите на нападот, тој одговорил дека терористите не го сакаат фудбалот бидејќи мислат дека е против муслиманите.


Две тепачки на навивачи синоќа во Тетово


Тетово, 11 април, 2016 - 12:27 (META) 

Членови на тетовската навивачка група „Војводи“ вчера, околу 19 часот, во Тетово нападнале две лице на возраст од 20 години. Инцидентот се случил на улицата Иво Лола Рибар, по која се движеле нападнатите. Тие биле удирани по главите и по телата. Во меѓувреме, ги разделиле две лица кои со возило запреле на улицата, по што напаѓачите се оддалечиле од местото. И двајцата тетовци добиле видливи повреди, пренесени се во тетовската клиничка болница и пуштени се на домашно лекување.

Тетовската полиција синоќа регистрираше уште една тепачка. Околу 19.30  часот, три лица додека се движеле кон своите домови по улицата Гоце Делчев во Тетово, биле пресретнати од две патнички возила „БМВ“ и „даеву матиз“, од кои излегле осум-девет непознати лица, членови на навивачката група „Балисти“, кои веднаш ги нападнале. Непознатите со тврд предмет и со тупаници удирале едно од лицата во главата и по екстремитетите, додека неговите другари го напуштиле местото за да побараат помош. Сосед го пренел повредениот во тетовската клиничка болница за да му се укаже  помош, каде е задржан за понатамошно лекување.

Полицијата проверува дали овој инцидент е поврзан со претходната тепачка, регистрирана на улицата Иво Лола Рибар во Тетово.


Тепачка меѓу навивачки групи од Црна Гора и од Македонија – 12 повредени, двајца потешко


Гостивар, 21 февруари, 2016 - 21:09 (META) 

Дванаесет повредени е билансот од физичката пресметка меѓу навивачите на фудбалскиот клуб Шкендија и на ракометниот клуб Будуќност од Црна Гора. Инцидентот се случил попладнево кај Сушички мост, кој се наоѓа меѓу Мавровска крстосница и планинскиот премин Стража.

Според полициски информации, инцидентот настанал откако навивачите на Шкендија, кои оделе на фудбалски натпревар во Кичево, почнале да фрлаат тврди предмети кон навивачите на Будуќност, кои со два автобуси се превезувале до Скопје, каде оделе да го бодрат нивниот тим против екипата на Вардар.

Двајца од вкупно 10 повредени навивачи од Црна Гора, добиле тешки телесни повреди.

– Еден беше повреден во пределот на главата, му беше укажана помош тука и потоа беше испратен во Скопје за понатамошни испитувања. Уште еден беше повреден во грбот, наводно од камења. Беше во потешка состојба и беше испратен на клиника во Скопје. Деветмина други, со помали повреди по лицето и по телата, се прегледани тука, по што се пуштени на домашно лекување – изјави д-р Бекир Зеќири од гостиварската болница.

На повреди се пожалиле и двајца навивачи од Шкендија, но по укажаната помош во болницата во Кичево, пуштени се на домашно лекување.

Полицијата допрва ќе истражува како дошло до инцидентот, по што ќе следуваат соодветни мерки.


Кривична пријава за тројца малолетници кои претепаа граѓани по фудбалски натпревар


Скопје, 27 септември, 2015 - 11:42 (META) 

СВР Скопје поднесе кривична пријава против тројца малолетници, двајца на возраст од 17 и еден на возраст од 15 години, од Скопје, поради постоење основи за сомневање дека извршиле насилство.

На 9 август 2015 година, околу 21 часот, по завршување на фудбалскиот натпревар Вардар – Шкупи, каде биле гледачи, се упатиле заедно, со уште неколку, засега непознати лица, кон градскиот плоштадот, каде околу 21.45 часот, се маскирале и физички ги нападнале М.М. (23), Б.И. (20) и М.И. (48) од Скопје, удирајќи ги со стаклени шишиња и со боксови по главата и по телото, по што го напуштиле местото на настанот.

Оштететните биле пренесени во Клиничкиот центар, каде им се констатирани телесни повреди и по укажаната лекарска помош биле пуштени на домашно лекување.

По преземени мерки од полициски службеници, како и по извршениот увид на видеонадзорот, истите се утврдени и повикани и во присуство на родител, извршен е разговор, по што им е поднесена кривична пријава.

СВР-Скопје и понатаму презема мерки и активности за утврдување и на други инволвирани лица.

Инаку, на едното пријавено лице на возраст од 17 години, предходно му била поднесена кривична пријава за учество во тепачка.


Перо Антиќ бурно поздравен од навивачите на Олимпијакос во Атина


Атина, 15 јуни, 2015 - 10:05 (META) 

Страсните навивачи на грчкиот кошаркарски гигант Олимпијакос не ја заборавија љубовта и почитта кон македонската НБА-ѕвезда Перо Антиќ.

Антиќ, кој викендов се најде во Атина за да го проследи натпреварот меѓу вечните ривали Олимпијакос и Панатинаикос, беше френетично поздравен и испратен од навивачите кои верно го следеа две години додека играше за црвено-белите во Пиреа.

Во моментот кога заминуваше од салата на стадионот на Олимпијакос, навивачите громогласно и бурно го поздавија, извикувајќи го неговото име, покажувајќи на овој начин дека спорот за името и политичките проблеми немаат место на спортските терени.

Антиќ беше две години во тимот на Олимпијакос и со него во тимот црвено-белите двапати ја освоија европската шампионска титула.

Македонскиот кошаркар и неговото семејство од првиот момент беа одлично прифатени и од соиграчите, но и од страсните навивачи на грчката кошаркарска сензација, без да има какви било проблеми поради политичкиот спор.

Навивачите на црвено-белите редовно го дочекуваат позитивно и со голема љубов при секоја негова посета на Атина и на натпреварите на Олимпијакос.

М.П.


Се степале навивачи на ФК „Скопје“ и ФК „Шкупи“


Скопје, 1 март, 2015 - 14:10 (META) 

Вчера, околу 16 часот, дошло до физичка пресметка помеѓу навивачките групи на фудбалските клубови „Скопје“ и „Шкупи“.

„Кај стадионот на „Металург“, по завршување на натпреварот помеѓу ФК „Скопје“ и ФК „Шкупи“, група од десет навивачи од навивачката група „Шверцери“ нападнала помала група од навивачи на ФК „Скопје“. Од полициски службеници веднаш било интервенирано и при преземањето службени дејства за приведување на Џ.В. од Скопје, полицискиот службеник бил попречуван од А.С.“, инфорираат од МВР.

За настанот е запознаен Јавниот обвинител и по целосно расчистување и документирање на настанот, против сторителите ќе биде поднесен соодветен поднесок.


На турските навивачи им се заканува доживотен затвор за пуч против Ердоган


Истанбул, 16 декември, 2014 - 16:55 (META) 

Почна судењето на навивачите на „Бешикташ“, кои се осомничени за обид за пуч против режимот на Реџеп Таип Ердоган.

Државното обвинителство бара доживотен затвор за 35 навивачи на фудбалскиот тим „Бешикташ“, од навивачката група „Царси“, кои се товарат дека со примена на „насилство и сила“ се обиделе да организираат пуч на минатогодишните протести против режимот на претседателот Ердоган.

Пред судот во Истанбул се собраа стотина навивачи, дури и од ривалските клубови на „Бешикташ“, во знак на солидарност со обвинетите.


Полицаец повреден при тепчка меѓу навивачите на „Вардар“ и на „Шкендија“


Тетово, 7 декември, 2014 - 12:56 (META) 

Полицаец доби повреди во пределот на главата откако полицијата интервенираше на вчерашната тепачка меѓу навивачките групи на фудбалските клубови „Вардар“ и „Шкендија“ кај градскиот стадион во Тетово.

Како што соопшти портпаролот на СВР Тетово, Марјан Јосифовски, инцидентот настанал откако група од 30-40 навивачи на „Вардар“, околу 13.30 часот, пристигнале и сакале да влезат на стадионот каде се играл куп-натпреварот помеѓу „Ренова“ од Џепчиште и „Вардар“ од Скопје.

– Организаторот не ѝ дозволил на групата да влезе на стадионот. Во меѓувреме, во нивна близина се собрале повеќе навивачи на „Шкендија“. Помеѓу двете групи почнале расправии и меѓусебни фрлања со камења и со шишиња. Со интервенција на полицијата бил спречен физички контакт меѓу двете групи. При тоа еден полицаец бил удрен по главата и веднаш бил префлен во тетовската клиничка болница, од каде по укажаната помош бил пуштен на домашно лекување – соопшти Јосифовски.

Полицијата привела тројца навивачи на „Вардар“, кои по извршените разговори биле пуштени и по расчистувањето на случајот ќе се соочат со соодветни поднесоци. Полицијата сè уште работи на откривање на идентитетот на лицето што го повредило полицаецот.