Граѓанското движење „Протестирам“ повикува на протестен собир на 17 мај, во 13 часот, пред Основниот суд 1, во Скопје и на заеднички марш до Владата на Република Македонија, што симболично ќе почне во пет до два.
„На вечерниот собир пред Собранието, по протестите, граѓаните кои протестираат секој ден во 18 часот се согласија да излезат на протестот на 17 мај. Протестот ќе почне во 13 часот пред Основниот суд 1 – Скопје. Заедно со „Студентски пленум“, пред Судот ќе се повика на ослободување на политичките затвореници од 5 мај наваму. Оттаму, во заеднички марш, како потсетување на долготрајната и здружена борба на сите, во 13:55 часот ќе се упатиме кон Владата на Република Македонија“, пишува во соопштението на „Протестирам“.
Од здружението велат дека за да ја нагласат автентичноста на движењето, и утре ќе се соберат на булеварот Климент Охридски во 18 часот.
Движењето протестирам има три главни барања и линии на дејствување.
- Итна оставка и преземање политичка и правна одговорност на целата Влада на чело со Никола Груевски за неуставното, корумпирано и неетичко владеење;
- Итно ослободување на сите активисти притворени од 5 мај наваму;
- Формирање влада за демократизација на институциите и за овозможување фер и демократски избори.
