Политичките односи меѓу Лондон и Москва се ставени „на чекање“ на иницијатива на Велика Британија поради настаните во Сирија и во Украина, соопшти рускиот амбасадор во Велика Британија, Александар Јаковенко.
– Практично, сите контакти нагло се прекинати на иницијатива на Велика Британија, а политичкиот дијалог се одржува само на највисоко ниво – изјави Јаковенко, додавајќи дека односите на министерско ниво се во фаза на стагнација.
Јаковенко рече дека суспендирани се и научните односи, а замрзнати се и преговорите во сферата на трговијата и на економската соработка, каде се разговарало за прашања од заеднички интерес. Единствена сфера во која сè уште има контакти меѓу двете држави е културата.
– Бројот на работници во руската амбасада во Лондон е намален затоа што британските власти одбиваат да им издадат виза на руските дипломати – рече Јаковенко.
