Qindra pjesëtarë të forcave speciale të armatosur deri në dhëmbë, me autoblinda dhe me armatim të rëndë janë dërguar mbrëmë në kontroll rutine në rajonin e Shkupit dhe Kumanovës, njoftoi sot Ministri i punëve të brendshme Oliver Spasovski. Sipas tij nuk bëhet fjalë për aksion të policisë, andaj edhe nuk ka të arrestuar. Prezenca e policisë ka pasur karakter parandalues, me qëllim që të shkatërrohen kanalet e trafikimit të emigrantëve.
“Mbrëmë nuk kishte aksion, kishim vetëm siç ju thash, prezencë të shtuar në këtë rajon, në këtë terren, në suazat e asaj që e përmenda- krizën që e kemi dhe vlerësimin se duhet në rajonin Kumanovë- Shkup të kryejmë vëzhgim më të madh dhe të mund të garantojmë siguri për qytetarët”.
Ministri shtoi se nuk duhet të ketë frikë dhe panikë në popullatë sepse situata është nën kontroll.
“Mbrëmë nuk ka pasur aksion policor, as arrestime, por vetëm se ka pasur prani të forcave të policisë për shkak të krizës që kemi me emigrantë. Rajoni Kumanovë-Shkup duhet të jetë nën mbikëqyrje në rritje, për shkak se ajo është pjesë veriore e kufirit, dhe se ka shpesh kalime të paligjshme, ju e dini se kemi pasur hyrje të emigrantëve dhe më parë përmes këtij kufiri, tha Spasovski, gjatë vizitës së tij në stacionin policor në Mateç”.
Spasovski demantoi zërat se aksioni është për shkak të hyrje së mundshme të një grupit të armatosur nga Kosovoa, e afërt me të akuzuarit për ngjarjet e Kumanovës.
“Spekulimet janë se është futur një grup. Edhe më herët theksova, bëhet fjalë për veprim parandalues”, tha ministri i brendshëm duke shtuar se mbrëmë nuk janë bërë kurrfarë bastisjesh.
