Основното јавно обвинителство повело постапка против 60-годишен скопјанец, под сомнеж дека му се заканувал на градоначалникот на Карпош, Стевчо Јакимовски дека ќе го убие и ќе му го уништи животот.
ОЈО Скопје го сомничи скопјанецот за кривичното дело – загрозување на сигурноста.
На 4 октомври, според обвинителството, осомничениот со моторцикл дошол пред куќата на градоначалникот на Општина Карпош и неговото семејство и без причина прво почнал на висок тон да го навредува, а потоа и вербално да се заканува дека ќе го убие и ќе му го уништи животот. Со заканите продолжил и кон сосед кој случајно поминувал таму.
Истиот ден, во вечерните часови, велат од обвинителството, осомничениот телефонски му се јавил на градоначалникот и продолжил да му се заканува. Откако Јакимовски го прекинал телефонскиот разговор, скопјанецот продолжил да му испраќа заканувачки пораки на вибер-апликацијата.
„Додека оштетениот го пријавувал настанот во полициска станица, осомничениот отишол во неговиот дом, викал и упорно ѕвонел на влезната врата, вознемирувајќи ги членовите на семејството“, се вели во соопштението на ОЈО Скопје.
Јавниот обвинител на судот му предложил да определи мерка на претпазливост – забрана за осомничениот да се приближува, да воспоставува или одржува контакти со оштетените лица на кои им ја загрозил сигурноста.
