![Krusevo](https://meta.mk/wp-content/uploads/2023/11/ali-nuredini-zxrgyzsna2c-unsplash-696x461.jpg)
Министерството за култура денеска го објави Конкурсот за финансирање проект од национален интерес – манифестација „Град на културата во 2024 година.“
Според насоките, пријавувањето се врши со електронско аплицирање на Националниот портал за е-услуги, почнувајќи од денес, заклучно со 29 декември до 23 часот и 55 минути.
Деталните упатства и поддршка при регистрирањето, може да се најдат на овој линк, како и преку контакт-центарот на Националниот портал за е-услуги.
На конкурсот, чија цел е создавање услови за рамномерен културен развој, достапност на културните вредности за граѓаните, како и заживување на културата на локално ниво, може да учествуваат општините во Република Северна Македонија, со исклучок на Град Скопје и скопските општини.
„Еден од приоритетите на Министерството за култура е унапредувањето и достапноста на македонската култура, а со проектот „Град на културата“ се зајакнуваат културниот развој и развојот на туризмот на локално ниво, а соработката со локалната самоуправа придонесува за економски и туристички поттик на општините низ државава“, велат од Министерството за култура.
„Град на културата“ годинава беше Крушево, чија програма се одвиваше под мотото „Крушево – жив споменик на културата“.