Владата го отповика Мико, а Лазе Еленовски го прати во Брисел


Скопје, 28 февруари, 2018 - 10:12 (META) 

Владата на вчерашна седница отповикала на неколку конзули меѓу кои најекспониран е Џејсон Мико, долгогодишен колумнист во пропаднатиот весник „Дневник“ и консултант на владата во времето на ВМРО-ДПМНЕ, кој бил плаќан од буџетот.

Претходно тој бил и лобист за ВМРО-ДПМНЕ и консултант. Според документите заведени на Американската агенција за регистрација за странски соработници – ФАРА, ВМРО-ДПМНЕ за 7.500 долари месечно го ангажирала Џејсон Мико да дава консултантски услуги непосредно пред изборите на 5 јули 2006 година, на кои партијата дојде на власт.

Покрај Мико, отповикани се и Ричард Голдман, Томас Танеф, Ендру Димитри Пејкоф, Лоу Влашо и Пуршотам Карамангала Џајарам.

Во рамките на точките за кадровски измени, Владата вчера го именувала Бујар Дарлишта за в.д. директор на Управата за водење на матични книги, а Лазар Еленовски е назначен за  специјален пратеник на Владата на Република Македонија за НАТО интеграции во Брисел.

На предлог на Mинистерството за финансии Владата го усвоила Предлог – законот за пријавување и евиденција на обврски кои ги имаат буџетските институции. Имено, досега не постоел унифициран механизам на евиденција и следење на обврските на субјектите кои располагаат со јавни средства. Новиот предлог – закон предвидува преку електронски систем да се евидентираат преземени, а неисполнети обврски на институциите, како и неплатените обврски.

Законот ги опфаќа органите на државната власт, единиците на локалната самоуправа, установите и институциите кои вршат дејности од областа на културата, образованието, здравството, детската, социјалната заштита, како и во други дејности од јавен интерес.


Бразил и Холандија ги повлекоа амбасадорите од Индонезија


Џакарта, 18 јануари, 2015 - 11:24 (META) 

Бразил и Холандија денеска ги повлекле своите дипломатски претставници од Индонезија откако власите на оваа земја погубиле шестмина затвореници, осудени за поседување дрога, пренесуваат светските агенции.

Игнорирајќи ги апелите за нивно помилување, синоќа стрелачки вод ја извршил смртната казна на шест луѓе, меѓу кои еден е iндонезиски државјанин, а останатите се странци, од Бразил, Холандија, Малави, Виетнам и од Нигерија.

Бразил го повлекол својот амбасадор заради натамошни консултации, а како што соопштиле тамошните власти, овој случај ќе влијае на билатералните односи меѓу двете земји.

Холандија, исто така, го отповикала амбасадорот од својата поранешна колонија, оценувајќи ја одлуката на индонезиските власти како сурова и нехумана казна, која претставува негирање на човековото достоинство и интегритет.