!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Укината титулата национален уметник, прифатени оставките на Мизо и на Грозданов


Скопје, 26 јули, 2017 - 11:29 (META) 

Владата на вчерашната 16. седница ги прифатила оставките на директорот на Дирекцијата на технолошки индустриски развојни зони, Виктор Мизо, како и на Цветко Грозданов, генералниот директор на АД за стопанисување со станбен и деловен простор, информираше владината прес-служба.

Разрешени се и Муедин Кахвеџи, директор на Педагошка служба, Весна Хорватовиќ од должноста директор на Бирото за развој на образованието и Костадин Богданов од должноста директор – владин агент на Бирото за застапување на Република Македонија пред Европскиот суд за човекови права, а на негово место како в.д. директор поставена е Драгица Џонова.

За директорка на Институтот за македонски јазик „Крсте Мисирков“ – Скопје, избрана е Елена Јованова-Грујовска, научен советник.

Владата одлучила за членови на надзорниот одбор на Македонска банка за поддршка на развојот да ги именува Никола Поповски, Веланд Рамадани, Кирил Колемишевски и Софче Јовановска, по добиена согласност од гувернерот на Народна банка.

Владата на седницата го усвоила и предлогот за измена и за дополнување на Законот за култура по скратена постапка за да се заштити буџетот од штетни менаџерски договори на раководни лица во културните институции.

Според информацијата споделена на владината седница, менаџерските договори направиле штета на буџетот од неколку милијарди денари.

На седницата се усвоил и предлогот за престанување на важењето на Законот за националниот уметник на Република Македонија, а на барање на Министерството за култура, Државниот завод за ревизија ќе изврши вонредна ревизија во министерството.

Владата на седницата одлучила да се врати постапката за стекнување лиценца за лектори, прекината во 2013 година, а дала и согласност да се поддржи Општина Чаир да се довршат работите за плоштадот Скендер-бег со средства од буџетот за 2018 година.


Изградени 700 станови за социјално ранливи групи


Скопје, 14 јули, 2016 - 14:39 (META) 

Техничкиот премиер Емил Димитриев денеска оствари работна средба со директорот на Акционерското друштво за стопанисување со станбен и деловен простор, Цветко Грозданов, при што разговарале за динамиката на изградба на станови, катни гаражи и на други објекти.

– Во делот на градба на станови за социјално ранливи групи, досега се изградни околу 700 станови и во моментов се градат околу 123 станови во Кочани, Македонски Брод и во Гостивар. Во наредниот период многу сме блиску до почеток на градба на нови 500 станови за оваа категорија граѓани во Скопје, Виница, Свети Николе, Пехчево и во Пробиштип – појасни Димитриев.

Становите наменети за млади брачни парови, исто така, се граделе со предвидената динамика. Досега такви станови се изградени во Скопје и во Битола, а планирано е да се почне со градба и во други градови.