Тевдовски: Се подготвува буџетот за 2018 година, ќе се кратат непродуктивните трошоци


Скопје, 29 август, 2017 - 11:38 (META) 

Работиме на подготовка на буџетот за 2018 година и ги прецизираме макроекономските проекции, изјави министерот за финансии, Драган Тевдовски, во интервју за телевизија „Сител“.

Тој додаде дека за следната година може да се очекува повисок економски пораст од годинава. Најави дека и следната година ќе се кратат непродуктивнтие трошоци, за, како што посочи, да им се даде шанса на оние продуктивни активности што ќе имаат мултипликативен ефект и ќе ја движат економијата.

– Кондицијата на буџетот се подобрува. Бруто-приходите од данокот на додадена вредност (ДДВ), тоа што најмногу го полни буџетот, се зголемија во јули. Буџетот навремено си ги сервисира обврските кон граѓаните и кон фирмите – изјави Тевдовски.

Според него, зголемувањето на минималната плата ќе влијае на раздвижување на економијата.


Мало раздвижување на македонските камиони на српско-хрватската граница


Скопје, 25 септември, 2015 - 10:52 (META) 

На граничниот премин Бајаково има мало раздвижување на колоната товарни возила, така што се пропуштаат камиони што превезуваат расиплива и опасна стока.

– Има минимално радзвижување, односно се пропуштаат камионите кои носат свежа стока и стока што е опасна за околината. Имено, тие возила според закон, не смеат да стојат. Пропуштањето оди тешко, бидејќи се вадат од колона и мора да се формира посебна лента за нив – изјави Билјана Муратовска од Здружението на превозници „Макам-транс“.

Царинската управа на Србија вчера соопшти дека неколкудневната блокада на граничниот премин Батровци, предизвика создавање на 15 километри долга колона на товарни возила.

– Многу од нив не можат да го променат правецот на движење, бидејќи се условени од меѓународни дозволи за транспорт, кои им налагаат да се движат во тој правец – се вели во соопштението на упрaвата.

Заменик-министерот за економија, Христијан Делев, соопшти дека македонските власти реагирале и им укажале на хрватските власти, дека „ситуацијата е надвор од сите меѓународни договори за протек на луѓе и на стоки.“

– Покрај со институциите во Брисел и со ЦЕФТА, контактиравме и со нашите колеги во Србија, Косово, Албанија и во Турција, кои се засегнати со овој проблем – изјави Делев.

Штетите од неколкудневниот застој на камионите што превезуваат лесно расиплива стока, допрва се утврдуваат. Македонските компании, пак, стравуваат од неисполнување на договорите со нивните странски партнери.

Македонски транспортери кои превезуваат сезонско овошје и зеленчук до Европа, се заглавени на граничните премини од Србија кон Хрватска откако Загреб ја затвори границата поради бегалската криза.

Станува збор за околу 1.000 камиони кои чекаат за влез и за излез на премините Батровце и Бајаково, кои се целосно блокирани и патничките возила се пренасочуваат кон други премини.