“Plenumi i nxënësve të shkollave të mesme” dhe qeveria nuk arritën marrëveshje edhe pas takimit të tretë. Nga qeveria thonë se janë të gatshëm të kthejnë konceptin e vjetër të maturës dhe matematika të mos jetë lëndë obligative, por lëshime për testimin ekstern nuk duan të bëjnë. Nxënësit thonë se nuk janë të kënaqu nga ky qëndrim dhe se nuk do të largohen nga kërkesat e tyre.
“Qeveria dhe Ministria e arsimit miratuan vendim të prerë në lidhje me mënyrën si do të jepet provimi shtetërorë këtë vit. Në përputhje me bisedimet me palët e ndryshme të interesuara, një pjesë me nxënësit, profesorët dhe ekspertët, vendosëm këtë vit provimi i maturës të jepet sipas konceptit të vjetër gjegjësisht matematika të mos jetë lëndë obligative dhe të mos ketë testim elektronik. Në lidhje me vlerësimin ekstern, qëndrimi është se kjo do të vazhdoj me konceptin aktual, tha zëvendës – kryeministri, Vladimir Peshevski.
Ai tha se takime më nuk do të ketë dhe se zyrtarisht bisedimet me “Plenumin e nxënësve të shkollave të mesme” nuk mund të thuhet se ka pasur sepse siç tha, shtrohet pyetja e përfaqësimit.
Nxënësit e shkollave të mesme thonë se janë të gatshëm të gjendet zgjidhje, por në raport me testimin ekstern nuk mund të arrijnë kurrfarë kompromisi me kompetentët. Për hapat e ardhshëm, thonë se do të bisedojnë në plenumin e përgjithshëm. Në ndërkohë, bojkotimi i mësimit dhe kampingu para MASH do të vazhdojnë.
