Претседателот Стево Пендаровски на денешната средба со неговата колешка од Косово, Вјоса Османи, ја потврди својата поддршка кон евроатлантските аспирации на Косово.
Тој изрази спремност Северна Македонија да ги сподели своите искуства во врска со реформските процеси, како на патот кон Европската Унија, така и во однос на членството во НАТО.
Пендаровски исто така изрази поддршка кон одлуката на Европската Унија за визната либерализација за Косово и учеството во различните регионални формати на соработка, а го поздрави и договорот за прифаќање на предлогот на Европската Унија за нормализирање на односите меѓу Косово и Србија. Тој се надева дека имплементацијата ќе придонесе кон мир, стабилност, безбедност и развој во регионот.
„Дополнително, сакам да порачам дека сме подготвени и во својство нa актуелни претседавачи со ОБСЕ да го помогнеме овој процес, особено во фазата на имплементација на одредени делови од постигнатиот договор, се разбира, во согласност со двете инволвирани страни“, рече Пендаровски.
Претседателите разговарале и за можностите за унапредување на правата на Македонците во Косово и за зближувањето на граѓаните од двете страни на границата, како и за олеснување и интензивирање на прекуграничната соработка.
По тет-а-тет средбата, претседателите ќе положат венци на гробот на Гоце Делчев во црквата „Св. Спас“ во Скопје. Според агендата, Вјоса Османи-Садриу за време на дводневната посета ќе оствари средби и со претседателот на Собранието, Талат Џафери, претседателот на Владата, Димитар Ковачевски и ќе се обрати на свечена седница во Собранието.