Лошото време предизвика 16 села во областа Лежа, северозападна Албанија да останат без струја. Како што јави „ТВ Клан Албанија“, силниот ветер ги оштетил далноводите во селата и од синоќа, овие области немаат електрична енергија.
Оваа телевизија објави и дека во градот Корча, на југот на земјата, ветрот оштетил многу дрвја и соборил покрив од станбена зграда, што можело да предизвика трагедија. Властите започнаа со работа за враќање на состојбата во нормала.
Екстремните врнежи оваа недела урнаа рекорди и во делови од Италија. „Скај њуз“ вчера објави дека во северозападна Италија за само 12 часа наврнале 29 инчи (околу 740 милиметри) дожд, со што е поставен нов европски рекорд на врнежи за волку краток временски период.