Директорот на Државниот пазарен инспекторат, Стојко Пауновски на денешната прес-конференција соопшти дека од повторното отворање на угостителските објекти на 28 мај до денес, изречени се 856 опомени во врска со спроведување на протоколите за работа кај кафулињата и рестораните.
– За викендот и вчерашниот ден, Државниот пазарен инспекторат поднесе 21 кривична пријава и уште 5 се во фаза на постапка. Во овој период константирано е дека меѓу дел од угостителски објекти, имало и 41 нерегистрирани субјекти на кои им се изречени прекршочни пријави и издадени се платни налози – изјави директорот на ДПИ, Стојко Пауновски.
Тој апелираше да се почитуваат мерките и протоколите, се со цел да не се зголемува бројот на заразени, а со тоа државата да заостанува во однос на соседите за олабавување на мерките.
Пауновски истакна дека голем дел од угостителите ги почитуваат протоколите.
– За да не дојде до судир со угостителите, дадовме предлози за менување на протоколите преку министерствата и Владата. Дел од предлозите може да бидат прифатени, дел не. Таму каде што може да има олеснување, ќе има – рече директорот на ДПИ.
Државниот инспекторат за труд пак, од 11 март до 28 мај годинава има регистрирано вкупно 2.300 пријави од граѓани, од кои 840 пријави се за непочитување на мерките за вирусот, а останатите се однесуваат на информации.