Жестоките борби околу градот Кундуз, во северниот дел на Авганистан, продолжиле и ноќеска, еден ден откако авганистанските безбедносни сили почнаа акција за да го повратат градот што во понеделникот беше заземен од талибанците, јавуваат светските агенции.
Официјални лица од војската на Соединетите Американски Држави (САД) соопштиле дека синоќа извршиле два нови воздушни напади врз позициите на талибанците.
Како што јавуваат медиумите, вчера имало жестоки борби за преземање на контролата на аеродромот во Кундуз, кој се наоѓа на неколку километри од градот.
Заземањето на градот Кундуз, кој брои околу 300.000 жители, се смета за голема победа на талибанските милитанти, откако нивниот режим во Авганистан беше симнат од власт во 2001 година.