Најмалку 10 лица загинаа во нападот со крстосувачка ракета на централниот плоштад на Харков наречен „плоштад Слобода“. Украинскиот претседател Володимир Зеленски по нападот изјави дека ваквиот напад е воено злосторство, односно државен тероризам од страна на Руската Федерација.
„После вакво нешто Русија е терористичка држава. Очигледно. И тоа мора да биде официјално. Ги повикуваме сите земји во светот веднаш и ефективно да одговорат на оваа криминална тактика на агресорот и да објават дека Русија врши државен тероризам. Бараме целосна одговорност за терористите пред меѓународните судови“, изјави Зеленски во своето обраќање пред јавноста.
Тој додаде дека ракетата што експлодираше на плоштадот во Харков била испукана од рускиот град Белгород. Зеленски рече дека украинскиот град Харков и рускиот град Белгород отсекогаш биле блиски градови, за кои границата меѓу нив била само условна, но дека работите по нападот се променети.
„Ова е терор врз градот. Ова е терор врз Харков. Терор врз Украина. На плоштадот немаше воена цел. Како и во оние станбени области на Харков, кои се погодени од млазна артилерија. Ракетата кон централниот плоштад е директен, со ништо нескриен терор. Никој нема да го прости. Никој нема да го заборави“, изјави претседателот Зеленски.
Во меѓувреме, спасувачките екипи од центарот на Харков јавуваат за најмалку 10 загинати и 20 повредени лица по ракетниот напад на седиштето на регионалната влада во Харков. Укринформ јавува дека зградата е целосно уништена и дека во моментов се расчистуваат остатоците од разурнатиот објект.