Двајца ресенци се осомничени дека уценувале нивна сограѓанка, барајќи од неа да им палти 2.000 евра, за да не објават компромитирачки видеоматеријал на интернет, соопшти полицијата.
Против осомничените Г.Т. (33) и Б.О. (45) се поднесени пријави за уцена.
Како што информираат од полицијата, првоосомничениот Г.Т., минатиот месец, ја пресретнал жената во близина на нејзиното работно место и, заканувајќи се дека ќе ги повреди нејзините деца, ја внел во возило, кое го управувал второосомничениот, кој потоа ја однел на непознато место.
Две недели подоцна, Г.Т. отишол кај жртвата на работа и ѝ покажал видеоснимка од неа во возилото, а потоа ѝ се заканил дека ќе ја покаже на нејзиниот сопруг и девер и ќе ја објави на интернет доколку не му исплати 2.000 евра.
Таа, исплашена, позајмила пари и двапати на осомничениот му исплатила по 1.000 евра.
Неколку дена подоцна, Г.Т., со уште едно непознато лице, повторно дошол кај неа на работа и ѝ побарал уште 2.000 евра.
Случајот бил пријавен на 20 ноември во полициската станица во Ресен, која веднаш презела мерки за прибирање докази и за расчистување на случајот.