Заменичката на претседателот на Владата зaдолжена за политики за добро владеење, Славица Грковска, денеска се сретна со Адела Моника Аксинте, амбасадорка на Романија во земјава. На средбата се разговараше за можноста за унапредување на соработката меѓу Северна Македонија и Романија, посебно во областа на креирање антикорупциски политики и во делот на доброто владеење, како и за споделување корисни искуства од Романија во процесот на пристапување кон ЕУ.
Вицепремиерката Грковска се заблагодарила за пријателството и поддршката од Романија и посочила дека Кабинетот за креирање на политики за добро владеење е фокусиран на неколку проекти поврзани со антикорупциски политики и интегритет, кои ќе се реализираат во следниот период.
„Амбасадорката Аксинте го поздрави почетокот на скрининг процесот за членство на Северна Македонија во Европската Унија и посочи дека нашата земја може да очекува експертска поддршка од Република Романија во имплементирање на реформите потребни за остварување на евро-интеграциските процеси“, соопштуваат од кабинетот на Грковска.
Во однос на отворање на преговорите со ЕУ, вицепремиерката Грковска се заблагодарила за искрената и пријателска поддршка од Романија. Вицепремиерката и амбасадорката Аксинте се согласиле дека двете земји треба да продолжат да ги одржуваат добрите односи и да работат на унапредување на соработката, која е во интерес на сите граѓани во двете земји.