„Новиот претседател на Собранието е избран легално и легитимно според Уставот, законите и деловникот. Според Уставот, деловникот и законите ќе биде избрана и новата реформска влада“, порача СДСМ во одговор на денешната прес-конференција на Зоран Илиоски од ВМРО-ДПМНЕ.
Илиоски обвини дека СДСМ и Горан Мисовски нелегално го избрале Талат Џафери за претседател на Собранието и дека на тој начин „покажаа дека се подготвени да ги погазат и Уставот и волјата на народот за да ги платат политичките фактури од албанските партии и да ја реализираат албанската платформа“.
СДСМ ѝ порача на ВМРО-ДМПНЕ дека треба да се откаже од лаги и од опструкции и да стане конструктивна опозиција.
„Неопходно e ВМРО-ДПМНЕ да се постави како конструктивна опозиција во интерес на граѓаните и на евро-атлантските перспективи, а прв чекор кон тоа е да се откажат од лаги и од опструкции на легалните демократски процеси. Нелегално и незаконски е извршено насилството во Собранието преку сериозни кривични дела на терористичко загрозување на уставниот поредок, за што ќе следува одговорност и за нарачателите и за извршителите“, се вели во реакцијата од СДСМ.