САД и Русија се договориле да разменуваат информации за ситуацијата на руско-украинската граница, рече американскиот државен секретар Џон Кери.
Украинската армија вчера ја обвини Русија дека испратила конвој од 32 тенка и камиони со војници до проруските сили во Источна Украина, кои се во судир со украинските сили.
– Доволно е да се каже дека имаме несогласувања за некои факти кои се однесуваат на Украина. Се договоривме да разменуваме информации за тоа. Исто така, се договоривме да го продолжиме овој дијалог – изјави Кери во Пекинг.
Тој денеска разговараше со рускиот министер за надворешни работи, Сергеј Лавров, во Пекинг, каде в понеделник почнува дводневен самит на лидерите на Азиско-пацифичката економска соработка.