Околу 80 тони линдан ископани од малата депонија во ОХИС вчера беа извезени на уништување во Франција. Третиот дел од депонијата започна со расчистување минатиот месец и досега се ископани и спакувани 231 тон на HCH отпад кои ќе бидат транспортирани на уништување во текот на следниот период. Како што информираат од Министерството за животна средина и просторно планирање, изминатиов месец расчистени се и 210 тони на земја контаминирана со HCH, чиј извоз е планиран за следните два месеци.
„Чистењето на малата HCH-делта депонија во ОХИС продолжува со ремедијација на лот 3, со кој ќе се отстранат 525 тони на HCH отпад и 210 тони на земја контаминирана со HCH. Во претходниот период, за време на чистењето на првите два лота од депонијата се извезени и уништени 957 тони на HCH отпад и 127 тони на земја контаминирана со HCH“, информираат од Министерството.
Чистењето на малата депонија со линдан продолжи минатиот месец по повеќе од шест месеци застој. Министерството за животна средина и просторно планирање во јуни го одобри планот за ремедијација на грчката компанија „Полиеко“, која повторно беше избрана за вториот дел од активностите за чистење на опасниот отпад.
Малата депонија со линдан има околу 13.000 тони, во големата депонија се претпоставува дека има околу 50.000 тони линдан, а депонијата во Пеленица пак исто така содржи огромни количини опасен отпад, околу 40.000 тони чист HCH и уште 6.500 тони мешан, заедно со отпад од фабрика за стакло. Високите концентрации на HCH во Пеленица се детектирани во покривниот слој земја, на длабочина помала од 20 сантиметри, а на длабочина од само половина метар е најден чист линдан. Во ОХИС до неодамна беа складирани и 64 тони на десетици други опасни хемикалии, кои за две години, во вкупно седум извози на хемиски отпад, беа извезени на уништување во повеќе држави.