Потпретседателот на српската влада и лидер на Социјалистичката партија на Србија, Ивица Дачиќ денеска изјави дека на претседателските избори победа во првиот круг, како кандидат на владејачката коалиција, може да обезбеди само актуелниот премиер и лидер на Српската напредна странка (СНС), Александар Вучиќ, кого го повика да донесе „рационална одлука“.
„Го повикувам Вучиќ да донесе рационална одлука која ќе донесе победа, а формулата за победа е Вучиќ плус Дачиќ еднакво на победа во првиот круг“, изјави тој.
Дачиќ рече дека нема да поддржи заеднички кандидат кој не може да победи во првиот круг.
„Не сакам мојата судбина да зависи од тоа дали некој има амбиција која не е реална во овој момент. Така се играа (Слободан) Милошевиќ, (Борис) Тадиќ, и се надевам и сигурен сум дека тоа нема да го направи и Вучиќ. Ако Вучиќ биде кадидат ние го поддржуваме, а ако биде некој друг, тогаш јас сум кандидат за претседател во име на нашата коалиција и нема дилеми околу тоа, а потоа ќе видиме кого ќе поддржиме во вториот круг“, изјави Дачиќ.
Во очекување Вучиќ да ја соопшти одлуката за тоа дали ќе биде кандидат на неговата партија за претседател на Србија, што претходно ја најави за 15 февруари, неговата кандидатура ја поддржаа и повеќе министри и влијателни членови на владејачката СНС.