Мрежата „Зголемување на граѓанското учество во Дигиталната агенда“ (ИЦЕДА) распиша повик за конкурирање за мали грантови за граѓански организации. Може да конкурираат граѓански организации од Северна Македонија и од земјите од регионот, а грантовите што ќе се доделуваат ќе изнесуваат меѓу 13.000 и 17.000 евра, за проекти со времетраење од 18 месеци.
Проектот „Зголемување на граѓанското учество во Дигиталната агенда – ИЦЕДА“ е кофинансиран од Европската унија и го спроведуваат Фондација Метаморфозис, Отворени податоци Косово (ODK), Академија за е-владеење (eGA), Центар за истражување, транспарентност и отчетност – CRTA, Lëvizja MJAFT, НВО 35 MM.
Во рамките на регионалната мрежа ќе се доделат 15 мали грантови на граѓански организации (ГО) од Албанија, Косово, Црна Гора, Северна Македонија и Србија.
Грантовите ќе се доделуваат со цел да се зголеми капацитетот на ГО и медиумите за справување со предизвиците поврзани со дигиталната агенда, овозможувајќи им да станат активни учесници во процесот, како и да се зајакне улогата на ГО во помагање на државните институции за подобро искористување на потенцијалот на информатичко-комуникациските технологии (ИКТ) со цел да се подобри квалитетот на нивните е-услуги за граѓаните и да се зголеми нивната отвореност, вклучително и постигнување поголема транспарентност и одговорност преку развој на ефикасни е-владини системи. Целта на проектот и на грантовите, исто така, е да се зајакне довербата и безбедноста на интернет преку обезбедување обуки и подигнување на свеста преку мрежа на ГО кои промовираат дигитална писменост, вештини и вклученост на регионално, национално и локално ниво.
Сите услови за конкурирање, како и потребната документација, може да се видат тука.