Информациите добиени од македонскиот претседател, Ѓорге Иванов, за новите мигрантски рути, ги предадов на службите, изјави денеска во бугарскиот парламент премиерот на земјата, Бојко Борисов, пренесува „БГНес“.
– Тоа што пред неколу дена претседателот на Република Македонија, Ѓорге Иванов, ме замоли, јас го пренесов на средбата на Европскиот совет. Нивните служби ги добија новите рути. Сето тоа е доставено на Државната агенција за национална сигурност (ДАНС), на МВР и на состанокот на министрите за внатрешни работи во Брисел – изјави бугарскиот премиер, Борисов.
Тој, во своето обраќање, истакна дека за разлика од Грција, која добила стотици милиони и ништо не направила, Македонија обезбедила хумани услови за мигрантите.
– Неколку месеци грчката влада не презема мерки. Во Грција во моментов не можат да покажат како завршено ништо реално, условите за бегалците таму се ужасни – изјави Борисов.
Претседателот Иванов во денешното интервју за бугарската новинска агенција „БГНес“ изјави дека не постојат јазични бариери со Бугарија и оти таа треба најмногу да ја поддржува Македонија и да ја прегрне. Тој во интервјуто додаде дека на бугарскиот премиер му предал мапа од новите рути што ги користат шверцерите на мигранти, а кои минуваат низ Бугарија.