Во воздушни напади кои погодија училиште во сириската провинција Идлиб, која се наоѓа под контрола на бунтовниците, загинаа 22 деца и шест наставници, соопшти УНИЦЕФ.
– Тоа е трагедија и срамота. Ако е намерно направено, се работи за воено злосторство – изјави директорот на УНИЦЕФ, Ентони Лејк.
Тој, исто така, истакна дека училиштето било напаѓано повеќепати и дека можеби се работи за најсмртоносен напад од почетокот на војната пред пет години.
Странските медиуми потсетуваат дека организациите за човекови права ги обвинуваат силите на сириската влада и Русија дека извршуваат неселективни напади врз цивили. Од друга страна, Русија ја негира вмешаноста во овие напади.
Руските и сириските борбени авиони не летаа поблиску од 10 километри од сирискиот град Алепо изминатите девет дена, соопшти руското министерство за одбрана.