Во Мадрид денеска ќе се одржи самит на земјите од југот на Европската Унија, кој се очекува, неколку дена откако Велика Британија го почна процесот на напуштање на ЕУ, да го истакне спротивното – продлабочувањето и проширувањето на Унијата.
На самитот се очекува да присуствуваат шефовите на држави или влади на седум земји: Португалија, Шпанија, Франција, Италија, Малта, Грција и Кипар. Тоа ќе биде трет самит на југот на ЕУ од септември 2016 година.
„Самитот ќе биде шанса да се испрати порака за единство и за посветеност на проектот на европска интеграција и тоа во пресудниот момент од историјата на ЕУ. Европа треба да продолжи да се занимава со прашања што се однесуваат на сите граѓани и да го зајакне проектот на интеграција“, велат во соопштението шпанските домаќини на самитот и додаваат дека теми на средбата ќе бидат доселувањето, економијата, социјалната и одбранбената политика на ЕУ.
Европскиот совет на 29 април треба да донесе одлука за насоките на преговорите на ЕУ со Велика Британија.
На состанокот ќе бидат претседателите на Франција и на Кипар, Франсоа Оланд и Никос Анастасијадис, премиерот на Италија, Паоло Џетилони, на Грција, Алексис Ципрас, на Португалија, Антонио Костас, на Малта, Џозеф Мускат, и на Шпанија, Маријано Рахој.