Европската Унија мора да им потврди на државите од Западен Балкан дека сè уште се грижи за нивната интеграција во европското семејство, истакна грчкиот премиер Алексис Ципрас, по завршувањето на самитот на ЕУ.
Грчкиот премиер на прес-конференцијата по самитот посочи дека е неопходно ЕУ да испрати јасна порака до државите од Западен Балкан, но и да побара од нив да ги следат европските вредности за демократско однесување и политичка култура.
– Треба да им дадеме сигнал, порака на државите од Западен Балкан дека за ЕУ е особено важно интегрирањето на овие земји во Унијата и, секако, да се поттикнат реформи, да се покаже демократска политичка култура – рече грчкиот премиер.
Ципрас изразил голема загриженост за случувањата во државите од Западен Балкан и рекол дека Грција ја поддржува одлуката за засилување на улогата на ЕУ во секторите безбедност и одбрана за спречување на можната дестабилизација на регионот.
– Во однос на Западен Балкан, ја нагласив нашата голема загриженост за развојот на настаните во регионот, регион со многу тешка историја. Мојата загриженост доаѓа од порастот на национализмот, меѓуетничките тензии, политичките кризи, политичката дестабилизација, но и од засилувањето на организираниот криминал и влијанието од трети држави – забележа Ципрас.
Според грчкиот премиер, Грција останува столб на мирот, стабилноста и на безбедноста на Балканот и ќе продолжи да одржува отворен канал на дијалог и на соработка со сите соседни држави, но и истовремено ќе ги заштитува меѓународното право и нејзината сувереност.