Американскиот претседател Доналд Трамп ќе присуства на самитот на НАТО на 25 мај во Брисел, потврди Белата куќа.
– Претседателот е нетрпелив да се сретне со своите партнери од НАТО, да го потврди нашиот цврст ангажман во НАТО и да разговара за прашања кои се пресудни за Алијансата, особено за поделбата на одговорноста на сојузниците и за улогата на НАТО во борбата против тероризмот – соопшти синоќа Белата куќа.
Стејт департментот претходно соопшти дека државниот секретар на САД, Рекс Тилерсон, ќе го пропушти својот прв НАТО-состанок во Брисел во април. На негово место, на состанокот ќе присуствува државниот потсекретар и политички директор, Томас Пенон, дипломат од кариера, кој беше дел од Стејт депарментот и за време на Џон Кери. Состанокот на министрите за надворешни работи на НАТО ќе се одржи на 5 и на 6 април во Брисел.
Стејт департментот со ваквата одлука ризикува да предизвика загриженост во Алијансата по критиките од претседателот Трамп дека НАТО е надживеан.
Стејт департментот наведе дека Тилерсон денеска во Вашингтон ќе се сретне со повеќето колеги од НАТО за време на состанокот на 68 члена на коалицијата против Исламска држва, кој се одржува во главниот град на САД.
Портпаролот на Стејт депарментот истакна дека неприсуствувањето на Тилерсон на средбата на НАТО не треба да се толкува како знак на непочитување на Алијансата.