„Нема да ги намалиме платите, излезот за економската криза во Македонија е во нивно зголемување. Тоа ќе креира дополнителна потрошувачка и ќе биде стимул за зголемување на продуктивноста во македонската економија“, одговори на новинарско прашање претседателот на комисијата за економија на СДСМ, Драган Тевдовски, откако вчера членот на извршниот комитет на ВМРО-ДПМНЕ, Кирил Миноски, ги обвини СДСМ дека пропагирааат отпуштања во јавниот сектор, намалување на платите и на пензиите.
– Како што се обврзавме во „Планот за живот“, до април 2017 година ќе ја зголемиме минималната плата на 12.000 денари. До крајот на мандатот, таа ќе изнесува до 16.000 денари. Ќе ги зголемиме платите во здравството и во образованието. За две години, ќе ја изедначиме почетничката наставничка плата со просечната плата во државата, а двојно ќе ги зголемиме платите на лекарите и на здравствените работници – изјави Тевдовски.
Тој додаде дека ако се гледа само јавниот сектор, платите на администрацијата во Македонија и во Албанија се на дното во регионов.