Продолжува работата во Управата за безбедност и контраразузнавање, информираат од Специјалното јавно обвинителство.
Од СЈО на „Фејсбук“ напишаа дека и покрај првичната соработка, наишле на опструкција да прибават специфична информација и докази врз основа на судската одлука.
„Се работи за специфична информација која е круцијална за нашето работење. Ние не се откажуваме додека не ја извршиме судската наредба. Јавни обвинители и истражители на Специјалното јавно обвинителство во текот на целата ноќ ќе дежураат во Управата за безбедност и контраразузнавање, сè до конечно спроведување на наредбата. Во просториите на Управата, освен вработени лица од управата, обвинители и истражители од Специјалното јавно обвинителство, на покана на директорот, присутни во одредени периоди беа и директорот на Бирото за јавна безбедност, Митко Чавков, и заменскиот министер Оливер Андонов“, велат од СЈО.
Претходно, специјалната јавна обвинителка Катица Јанева рече дека влегле воУБК за конечно да се дознае кој прислушувал, дали УБК или странските служби, и најави дека ќе работат на смени, сè до завршување на работата.