Во рамките на својата програма за борба против дезинформациите и лажните вести, што на Балканот многу бргу ги минуваат границите и бргу осамнуваат во медиумите на друга држава и понекогаш и на друг јазик, „Мета.мк“ редовно пренесува што е актуелно кај сродните сервиси за проверка на фактите и борбата против дезинформациите во регионот, односно од Хрватска на север, до Грција на југ.
Faktograf.hr, хрватскиот сервис за проверка на фактите и борба против дезинформации, открил случај на тешка манипулација со фотографија, во која скриншот од видео прилог на еден новинар од Даблин е преправен и новинарот е претставен како човек што се иселил од Хрватска поради незадоволство од политиките на хрватската влада.
Имено, порталот Paraf.hr објавил текст со наслов „ХРВАТ ОД ИРСКА МУ ОДГОВОРИ НА ПЛЕНОВИЌ: Сатано, не отидовме за да заработиме, туку да работиме“, кој се однесува на наводна реакција на интервјуто на хрватскиот премиер Андреј Пленковиќ за германскиот дневен весник „Франкфуртер Алгемајне Цајтунг“ во кое Пленковиќ тврди дека голем број млади луѓе што одат во странство ја напуштаат Хрватска поради финансиски причини, а не поради корупција и непотизам.
Притоа, не се наведува името на човекот чија изјава наводно се пренесува, ниту изворот на овие тврдења, ниту пак дали со човекот директно разговарале или од каде ги презеле.
Текстот го илустрирале со фотографија на маж на улица во Даблин на кого му ги замаглиле очите. Проверувачите на факти од Faktograf.hr утврдиле дека станува збор за еден скриншот (исечок) од видео-прилогот „Зошто Ирска е ветена земја за Хрватите?“ на новинарот Јосип Шариќ од Ирска за „Ал Џазира Балканс“, со што новинарот неосновано е директно поврзан со изјавите.