Во грчкиот парламент денеска почнува тридневната собраниска расправа за гласање доверба на новата влада на СИРИЗА и на Независни Грци. Собраниската дискусија ќе почне со говор на премиерот Алексис Ципрас, кој ќе ја претстави владината програма, а ќе продолжи со излагања на секој од министрите, кои ќе ги претставуваат програмите и целите на секое од министерствата.
Тридневната процедура ќе заврши в среда на полноќ, со гласање доверба на владата. Владата со сигурност ќе добие доверба бидејќи парламентарната група на СИРИЗА и на Независни Грци има парламентарно мнозинство од 155 пратеници.
Се очекува за време на обраќањето и претставувањето на програмата, Ципрас да ги истакне приоритетите на владата, односно спроведувањето на договорот со европските кредитори, борбата со корупцијата, реформирањето во државната администрација, како и обидот да се издејствува реструктуирање и намалување на грчкиот долг откако европските партнери ќе ја извршат првата процена на грчкото придржување до договорот за новата финансиска помош.
М.П.