Грција формираше ново министерство кое ќе се справува со влијанието на климатските промени во земјата по катастрофалните пожари што ја погодија земјата изминатово лето. На чело на новото министерство е поставен поранешниот кипарски еврокомесар Христос Стилијанидес, јавува Јуроњуз.
Владата призна дека изминатово лето постоеле грешки во справувањето со шумските пожари во Грција, кои проголтаа 116.000 хектари шума на островот Евија и јужните делови на земјата. Како нов министер, Стилијанидес ќе биде ангажиран да раководи со противпожарните екипи, помошта при катастрофи, но и ќе треба да воспоставува политики за прилагодување на земјата на зголемените температури како резултат на климатските промени.
„Последиците од климатските промени нè надминаа, и ние мора да ги забрзаме големите промени без одложување“, изјави министерот за климатски промени Стилијанидес, додавајќи дека превенцијата од катастрофи и подготвеноста е најефикасното оружје кое го имаат во моментов.
Инаку, пожарите коишто ја зафатија Грција изминатово лето се квалификувани како најлоши во изминативе децении. Покрај грешките во справувањето со пожарите и намерното подметнување на дел од нив, оваа балканска земја во екот на катастрофата се соочи со продолжен топлотен бран со температури од над 40 степени, придружен со силни ветрови.