Холандскиот амбасадор Ваутер Пломп изјави дека Договорот од Пржино треба да се спроведе и да се исполни целосно, а не само формално.
„Сите аспекти на Договорот од Пржино треба да се испрочитуваат и да се спроведат, а одржувањето на слободни, фер и инклузивни избори е еден од нив. Суштината на овој политички договор или кој било договор не е во формалното исполнување, туку во вистинската посветеност и целосното спроведување на договорените реформи“, стои во писмената изјава на Пломп, дадена по назначувањето на техничката влада што ќе ги спроведува предвремените избори и одлуката на СДСМ да ги бојкотира, доколку се одржат на 24 април.
Амбасадорот ги повика политичките лидери да најдат решение за отворените прашања од договорот.
– Сите вклучени страни треба, без понатамошно одложување, да работат заедно за да ги решат останатите прашања за да овозможат спроведување на веродостојни избори, со почитување на сите други делови од договорот кој нуди долгорочно решение за политичката криза во Република Македонија – вели Пломп.