Потпретседателот на САД, Мајк Пенс, во телефонски разговор со македонскиот премиер Зоран Заев, вчера го честитал постигнувањето на Договорот на Македонија со Грција за решавање на спорот за името и им честитал на Заев и на неговиот грчки колега Алексис Ципрас за покажаното лидерство, соопшти македонската влада.
„Според потпретседателот Пенс, договорот покажува јасен сигнал дека Република Македонија се доближува кон развиениот западен свет, што ќе биде јасно верификувано на самитот на НАТО во Брисел наредната недела. Поканата за влез во НАТО, како што рече Пенс, е јасен сигнал дека позитивниот резултат од референдумот ќе значи конечно полноправно членство на Македонија во Северно-атлантската алијанса“, стои во владиното соопштение.
Пенс порачал дека САД ќе бидат и понатаму вклучени и ќе ги поддржат процесите кои следуваат во наредниот период во Македонија, посебно за спроведување на реформите, како и за целосно спроведување на договорот со Грција. Тој посакал и успешни преговори за членство во Европската Унија, известува Владата.
Пенс за телефонскиот разговор извести преку својот Твитер-профил, порачувајќи дека искажал поддршка за Договорот со Грција. Тој вели дека успешното спроведување на договорот ќе ја отвори вратата кон евроинтеграцијата и ќе ги засили просперитетот и стабилноста на регионот.
Spoke to Macedonian Prime Minister @Zoran_Zaev to offer U.S. support for the historic agreement to resolve the long-standing name issue with Greece. The successful implementation will open the door to European integration and bolster the region’s prosperity and stability.
— Vice President Mike Pence (@VP) July 5, 2018
Потпретседателот на САД имал телефонски разговор и со грчкиот премиер Ципрас, кому му ја упатил истата порака за значењето на Договорот за напредокот на регионот.
Spoke to Greek Prime Minister @tsipras_eu to offer U.S. support for the historic agreement to resolve the long-standing name issue with Skopje. Successful implementation of this agreement will bolster the region’s prosperity and stability. — Vice President Mike Pence (@VP) July 5, 2018