Демократската унија на Албанците на седницата на централното претседателство одлучи да учествува во новата влада предводена од СДСМ, образложи портпаролот Бујар Османи по полноќ.
– ДУИ одлучи да ја почитува волјата на граѓаните и да учествува во владата. Бараме Иванов да го додели мандатот на лидерот на СДСМ, Зоран Заев – рече Османи во текот на состанокот на централното претседателство на ДУИ во партиското седиште во Мала Речица.
Според него, таква е волјата на мнозинството Албанци во Македонија. Османи рече дека ДУИ останува посветена на точките од декларацијата на Албанците, за која нагласи дека е потпишана во Скопје. Тој рече и дека декларацијата, односно платформата, не го загрозува унитарниот карактер на државата и не отстапува од Уставот и Охридскиот рамковен договор.