Пo немилите настани што се случија вчера во Куманово, во кои загинаа осум полицајци, со порака на сочувство до семејствата на загинатите полицајци се огласи и Општина Прилеп.
„Со длабока жал и тага ја прифативме веста за загинатите и повредени припадници на безбедносните сили. Општина Прилеп им изразува сочувство на фамилиите на загинатите херои, кои се наша гордост и секогаш ќе бидат врежани во срцата и во меморијата на сите нас. Како Општина, се гордееме со храброста и со пожртвуваноста на припадниците на МВР кои храбро застанаа на браникот на татковината, разбивајќи една од најмоќните терористички групи на Балканот. Лично, како градоначалник, во овие тешки моменти, кога се нападнати и загрозени суверенитетот, безбедноста и слободата на македонските граѓани, ги повикувам и ги замолувам граѓаните, без оглед на нивната национална, верска, политичка или друг вид припадност, да ја зачуваат присебноста, мирот и соживотот, кои се основни постулати во функционирањето на државата. Македонија е наша заедничка татковина и главна цел на сите е стабилна, просперитетна, економски моќна држава, држава која ќе биде дел од евроатланските интеграци“, се вели во соопштението од Општина Прилеп.