Најмалку 12 лица загинаа при руските воздушни напади што рано утринава погодија повеќе градови во Украина, вклучувајќи го и главниот град Кијив. Од нив, десет луѓе загинале во централниот град Уман, откако проектили погодиле станбени згради, пренесува Би-би-си.
Во градот Днипро загинале две лица, меѓу кои и едно дете, а уште тројца се повредени во ракетниот напад, јави Укринформ.
Експлозии имало и во градовите Кременчук и Полтава.
Украинскиот претседател Володимир Зеленски на Телеграм напиша дека во Уман биле уништени 10 станбени блокови и дека нападите покажуваат оти е потребно да се преземат дополнителни меѓународни мерки против Русија.
Нема информации за цивилни жртви во Кијив, а шефот на градската воена управа рече дека ова е прв руски ракетен напад врз главниот град во последните 51 ден, јави Би-би-си.
Руските напади се случуваат додека се верува оти украинските сили се подготвуваат за офанзива со воена опрема, вклучително и тенкови, испорачана од западните сојузници.
Инаку, Укринформ објави дека до утрово, како резултат на руската вооружена агресија врз Украина биле убиени 471 деца, а повредени 952. Овие податоци не се конечни, бидејќи траат напорите за утврдување на жртви во областите на воените операции на привремено заземените и ослободените територии.