Германската канцеларка Ангела Меркел предупреди на опасност од вооружени судири на Балканот, каде што поминуваат најголем дел од бегалците, во случај Германија да ја затвори границата со Австрија.
– Тензии во земјите на Западен Балкан веќе има и не сакаме да дојде до воени судири – изјавила Меркел на собирот на Христијанско-демократската унија во Дармштат, а пренесуваат германските медиуми.
Стручњаците предупредуваат дека ако Германија, како главна дестинација на бегалците, ги затвори границите, истото ќе го сторат и земјите на Балканот, преку кои поминуваат најголем број мигранти и бегалци.
ЕУ објави дека кон крајот на октомври, во Грција и на Балканот ќе бидат воспоставени 100.000 прифатилишта, за да се сопре најголемата мигрантска криза досега.
Прашањето за бегалците предизвикува раздор во Германија меѓу владејачката коалиција на конзервативците и социјалдемократите, кои на состанокот во неделата не успеаја да постигнат договор, бидејќи дел од конзервативците побараа Германија во 2015 година да прифати помалку од очекуваните еден милион бегалци.