Над сто пратеници од парламентот на Велика Британија, заедно со уште 27 британски политичари, се потпишаа на писмо до државниот секретар Дејвид Камерон, во кое се бара Обединетото Кралство да престане да продава оружје на Израел, пренесува Гардијан.
Во писмото стои дека е неприфатливо продажбата на оружја на Израел да продолжи како што досега. Се истакнува дека неодамнешна истрага на ОН покажала дека двајца британски доктори биле убиени во бомбардирање од Ф-16 борбен авион, кој имал делови произведени во Велика Брианија.
Писмото доаѓа кратко по резолуцијата која беше усвоена во Советот за безбедност на Обединетите нации (ОН), во која се бара итно примирје во Газа, како и ослободување на заложниците заробени од Хамас.
Израел покажува знаци дека не планира да ги следи барањата на резолуцијата, што се гледа во нивното обемно бомбардирање на југот на Газа, како и во повлекувањето на израелската делегација во преговорите за примирје во Катар. Дополнително, министерот за одбрана на Израел Јоав Галант изјави оти на американскиот државен секретар Ентони Блинкен му рекол дека единствениот пат до мир е „одлучна победа“ за Израел.
Претставничката на САД во Советот за безбедност Линда Томас-Гринфилд, која беше воздржана при изгласувањето на резолуцијата во ОН, тврди оти резолуцијата не е обврзувачка. Но, ОН експерти тврдат дека резолуции изгласани во Советот за безбедност, особено тие кои повикуваат на конкретно дејствување, а не се состојат само од препораки, се легално обврзувачки. Велика Британија, која гласаше за резолуцијата, стои зад истиот став.
Дополнително, Томас-Гринфилд инсистира оти резолуцијата бара ослободување на заложници како предуслов за примирје, но резолуцијата бара двете работи да одат паралелно.