Локалната самоуправа од Охрид ветува одлична празнична забава, на отворено, на градскиот плоштад Св. Климент Охридски, за новогодишната ноќ.
Меѓу другото, ќе настапат музичките ѕвезди Викторија Лоба и Боби Мојсовски, ансамблот „Билјана јуниор“ и групата „Компас бенд“.
За украсување на градот ќе бидат потрошени 1.180.000 денари. За дочекот на Нова година, со целокупната програма, вклучувајќи ги и естрадните уметници, ќе бидат потрошени уште дополнителни 700.000 денари.
– Очекуваме преполн плоштад на самиот дочек, додека според најавите на туристичките агенции, хотелиерите како и од приватните станоиздавачи, Охрид и оваа година да биде преполн со гости за новогодишните празници. Најголем број од нив ќе бидат од Македонија, но и од соседните држави, пред сè, од Србија, Црна Гора, Бугарија и Албанија, како и од Полска и од Турција – најави градоначалникот Никола Бакрачески.
Бакрачески смета дека божиќните празници ќе бидат продолжение на годинешната успешна туристичка сезона, со пораст во бројот на гостите за 11 отсто и на остварените ноќевања за повеќе од 7 проценти.