Лидерот на СДСМ, Зоран Заев на 22. конгрес на партијата беше повторно избран за претседател на партијата, а Радмила Шекеринска беше реизбрана за заменик претседателка.
Од 723 делегати, на конгресот гласале 643, а од нив 597 делегати му дале поддршка на Заев кој беше единствен кандидат за лидер на партијата. На конгресот избрани се и членови на Централниот и на Надзорниот одбор.
Заев на завршното обраќање им се заблагодари на делегатите на дадената поддршка и рече дека чест му е што ја води партијата.
– Оваа поддршка за мене е обврска. Ќе продолжам да работам со уште поголема одлучност и верба дека може да создадеме сегашност за сите и да изградиме иднина за сите. Пред нас е долг пат, бараме да имате трпение. Ќе работиме темелно и посветено. Ќе изградиме општество на вредности и на еднакви шанси. Ќе имаме унитарна држава водејќи се од демократските вредности и човековите слободи и права. Македонија има со што да се гордее, граѓаните со пенкало срушија режим и се на чекор на формирање на реформска европска влада – рече Заев.
Клучниот збор кој покажавме дека функционира секаде е зборот доверба, изјави заменик претседателката Шекеринска која рече дека партијата сака да го врати животот во Македонија.
– Не беше лесно, но чекор по чекор, создававме впечаток на луѓе кои знаат каде да ја движат државата и партијата. Нашата цел е позната, јасна, тешка и возможна. А тоа е да ги заборавиме изгубените 11 години и да ја вратиме Македонија на патот кон членство во НАТО и ЕУ. Ви ветувам дека заедно ќе работиме во полза на Македонија и по четери години повторно ќе бидеме горди на тоа што сме го направиле – додаде Шекеринска.
Конгресот траеше околу 6 часа, а на отворениот дел присутни беа и градоначалниците на ДУИ, Теута Арифи, Изет Меџити и Невзат Бејта, лидерот на Беса, Билал Касами, лидерот на Достоинство, Стојанче Ангелов, поранешни функционери од СДСМ како и европратеници и претставници од сестринските партии на СДСМ.