Премиерот Зоран Заев ќе се сретне со претседателот на Европската комисија, Жан-Клод Јункер, за време на својата дводневна работна посета на Брисел на 5 и 6 декември, информираат од кабиентот на премиерот.
По средбата, која е прва меѓу македонски премиер и актуелниот претседател на Европската комисија, предвидени се заеднички изјави на Заев и на Јункер.
„На 6 декември, Заев ќе се сретне со претседателот на Европскиот парламент, Антонио Тајани, веднаш по молитвениот појадок во Европскиот парламент. Истиот ден, попладнето, премиерот ќе има состанок со високата претставничка за надворешна политика и за безбедност на Европската Унија, Федерика Могерини. Премиерот Заев ќе има средба и со комесарот за соседска политика на ЕУ и за преговори за проширување, Јоханес Хан, со што завршува работниот дел од посетата на највисоките институции на ЕУ“, се вели во соопштението од Владата.
За време на оваа посета на највисоките институции на ЕУ во Брисел, Заев и делегацијата на Владата, во состав вицепремиер за европски прашања, Бујар Османи, министер за надворешни работи, Никола Димитров, министер за транспорт и врски, Горан Сугаревски и генералниот секретар на Владата, Драги Рашковски, ќе имаат средби и со други високи претставници на Европскиот парламент и на Европската комисија.
Во рамките на оваа дводневна посетата на Брисел, премиерот Заев ќе учествува на дебатата на тема „Македонија и регионот на Западен Балкан на патот кон членството во Европската Унија“ во организација на Центарот за европски политички студии (CEPS), како и на трибината „Македонија по Шарената револуција: Нови можности за успешно пристапување во ЕУ“, во организација на Фондацијата „Фридрих Еберт“ во Брисел.