Врховниот суд на САД соопшти дека ќе ја разгледа одлуката на Врховниот суд во Колорадо со која се отстранува поранешниот претседател Доналд Трамп од гласачкото ливче во таа држава. Судот закажа усно сослушување на 8 Февруари.
Трамп останува на гласачкото ливче бидејќи одлуката на понискиот суд со која се дисквалификува е ставена во мирување во очекување на одлука на Врховниот суд. Ако судиите заклучат дека Трамп не е подобен за јавна функција, тогаш сите гласови дадени за него нема да се бројат. Иако пресудата од Колорадо се однесува само на таа држава, судовите во неколку други држави, исто така, го разгледуваа прашањето за подобноста на Трамп, иако ниту еден таков случај не стигна толку далеку како оној во Колорадо.
Минатата недела, државниот секретар на Мејн го отстрани Трамп од прелиминарните избори во таа држава во 2024 година, а тимот на поранешниот претседател во вторникот поднесе жалба на таа одлука пред државниот суд. Врховниот суд на Орегон, исто така, наскоро би можел да одлучува за обидот за отстранување на Трамп од изборите во таа држава поради неговата улога во бунтот на 6 Јануари 2021 година.
Од кабинетот на кампањата на Трамп соопштија дека очекуваат фер сослушување во Врховниот суд.
„Случајот е дел од добро финансираниот напор на левичарските политички активисти кои сакаат да го запрат законскиот реизбор на претседателот Трамп овој ноември, дури и ако тоа значи обесправување на гласачите“, изјави портпаролот на кампањата Стивен Чеунг.