Новите директори на Управата за безбедност и контраразузнавање (УБК) и на Бирото за јавна безбедност (БЈБ) ќе бидат познати во вторник, за кога е закажана редовна седница на Владата, потврди за „Мета“ владиниот портпарол, Александар Ѓорѓиев.
На оваа седница треба да бидат именувани наследниците на Сашо Мијалков и на Митко Чавков, на овие две високи позиции во Министерството за внатрешни работи.
– Редовна седница на Владата ќе се одржи во вторник, на која, како дел од дневниот ред, ќе биде поставено и прашањето за именување директори на УБК и на БЈБ – ни изјави Ѓорѓиев.
Овие две високи позиции во МВР останаа празни откако Сашо Мијалков си поднесе оставка на местото директор на УБК, а досегашниот директор на БЈБ, Митко Чавков, беше именуван за министер за внатрешни работи, по оставката на Гордана Јанкулоска.