Авиокомпаниите Визер, Луфтханза и Аегеан Ерлајнс доставија понуди на тендерот за доделување финансиска поддршка за воведување нови авиолинии од Меѓународниот аеродром „Скопје” и аеродромот „Св. Апостол Павле” во Охрид за периодот од 2023 до крајот на 2025 година. Јавниот повик траеше од 20 декември 2022 година до вчера, соопшти денеска Министерството за транспорт и врски.
Понудите денеска биле отворени, а според Министерството, следната недела ќе биде извршена евалуација на понудите од страна на Комисијата составена од членови од неколку државни институции, по што се очекува да има избрани авиокомпании со кои ќе се склучи договор за субвенции за нови летови.
Според повикот, за годинава се предвидени 1,1 милион евра за финансиска поддршка за нови авиолинии и истите ќе се доделат согласно критериумите за рангирање на новите дестинации по следниот редослед: период на oперирање на дестинацијата, број на неделни летови, атрактивност на аеродромот кон кој оперира и број на седишта понудени на продажба.